先介紹下自己先啦，我叫呀黑，唔係我個人好黑，而係我真係好黑仔。

今日係九月一呀，係我升中一嘅日子呀，勤力嘅我梗係一早就做完哂D功課啦，其實係唔識人，冇得抄迫住要做。

中一頭個幾個禮拜就咁比我hea過左，本身仲滿心歡喜嘅我以為中學有咩唔同，原來都係一樣要做功課，一樣要留係學校食lunch，仲要鬼死咁橋同小學個間一樣。無聊想搵下野玩嘅我於是就參加左學校嘅中三帶中一認識校園活動，諗住去識番幾個人。

今日係個活動嘅第一次聚會，可能係第一次嘅關係，揀左係禮堂到搞，仲要其他個幾班中一都有份，個場面墟冚到呢。

「哦~原來係要玩遊戲。」我從MC口中得知。

貪玩嘅我就梗係中意啦，我撲哂身去玩啦。但係經過幾個遊戲之後，我班嘅分數竟然同D班一樣，去到最後一個決勝局啦。

「等朕carry你地啦，我出去，一個打十個都得呀。」我好有自信地講。

「咪輸呀，輸左請飲野呀。」我班嘅琼B講。

我冇理到佢就沖左出去。決勝局玩嘅係麻芝菇----猜枚版包剪揼，同我對戰嘅係D班，姐係只要贏左佢就得啦。哈哈，今次仲唔係天助我也?

「輸左請妳食飯都得呀。」面對我嘅強項，我好有信心咁轉身講。

我再轉番身個陣，我成個腦只有三個英文字，「OMG」，唔係LoL個隊伍名呀，係「Oh My God」，係我面前出現嘅係一個女仔，我已經諗唔到有咩可以形容到佢，只能講三個字，「實娶得過」。

「喂!!!做咩呀你，企係到又唔郁，嗱，你輸左啦，一陣個餐冇走雞啦。」用唔知係開心定嬲嘅語氣同我講。

「咪住先!!!頭先妳見唔見到個靚女呀，佢擾敵呀喂。」我好無辜咁講，點解會咁黑仔都有架，明明就贏硬。

「我理得你咩事呀，總之就係輸左，君子一言既出駟馬難追，你唔係想反口呀?」琼B恨恨咁望住我。

「說話呢就唔係咁講嘅，妳都識話啦，我係君子來架嘛，冇有驚。」面對我識左九年嘅琼B，我都係輸左。

果然自古以來，英雄難過美人關，「今次真係天妒英才呀，我D運氣去哂邊呀~~~」我可以做嘅只有向天一呼，之後就去兌現承諾。

食完飯之後返到屋企，沖完涼，做完功課，就灘左係張床到，一合埋眼就諗起D班個女仔。佢個個可愛嘅冬菇頭再加埋兩粒怕丑嘅走粒，簡直就殺死人呀，連我呢個最接近神嘅男人都hold唔住啦，就係咁，我決定對佢展開追捕。但係我諗諗下，自己咁黑仔，容咩易表白撻Q，咪比人笑死。

唉~唔通真係只可以睇住佢比人帶走?我恨個天，更恨我自己。