而其中，我看到了那個與眾不同的「她」。

啱啱來到呢個小人國經已搞到我個心噗噗咁跳，宜家轉身，見到前面嗰個「少女」，仲高過我，大過我，手指尾直情可以壓扁我......心諗：「佢眼中嘅我同我望住班小人嘅感覺係咪差唔多？」同時，我個額頭嘅汗滴落地嘅程度大概可以浸到堆「螞蟻」以為海嘯，因為我真係好驚。

我啲汗滴咗幾耐，我就企咗係到幾耐。我極度呆滯咁仰望緊個「少女」，發現原來佢都幾靚，後生又五官標致，眼大大，瓜子臉，粉嫩嘅嘴唇，笑起來仲有小酒窩添。你話如果係現實中有個咁嘅女朋友都唔錯，至少好過我地學校啲「男人婆」。

不過，我望住呢個情景，不如搵個人教我應該點做？

「呃......靚女，你係咪來錯咗我來錯咗嘅呢個小人國？呀唔係，係......小小人國。」我終於開到口。

「噗哧......咩小小人國呀哈哈哈......」佢似乎比我嗰句極無聊嘅陳述句引到笑咗。「的確係小人國呀，我係呢到嘅守護神，你可以叫我Jan呀。話說其實小人居民睇我唔到，我係為咗出來迎接貴賓——即係你，先至出來，可以當我係個靈魂咁嘅存在。」跟住就介紹咗佢自己比我知。

「哦，即係鬼啦，有英文名，睇來係洋鬼子。你同我以前啲女朋友差唔多姐，不過係靚少少少少咁嘅。我從小就比人當貴賓架啦，服侍得我好啲唔該。」我個心每秒幾百萬上落咁講。咁我都唔會話佢知我有幾淆底嘅，更加唔會話佢聽我平時點樣係學校做人笑柄，女朋友？仲加曬氣添，根本就無。

「哈哈你講嘢好好笑呀，唔怪得個個都當你貴賓啦，我都好想同你做朋友架。久仰大名啦，Jacky仔，以前睇tvb見過你。」Jan好興奮咁講，似花痴多過所謂嘅「守護神」。

我感覺真係好奇怪，做乜平時學校啲女仔一聽我講呢啲廢話就覺得我白痴，何況我自己都覺得無聊，何來幽默？但呢個呀Jan真係「與眾不同」，講乜都覺得我好笑，癲癲地嘅。

不過唔緊要啦，佢當我貴賓呀嘛，真係人生第一次，老豆媽子都未對我咁好過。我不禁暗爽咁嘴角上揚，聳聳下肩，因為真係好正。

正當我笑得開懷嗰陣，上空突然來咗個巨大嘅物體遮住陽光，慢慢向我靠近。「哇咩事呀！唔好壓扁我，嗚呀！！」我好似個小女孩咁合埋眼尖叫，形象瞬間毀壞咗。

而接下來嘅居然唔係有嘢壓扁我，而係有好柔軟嘅物體夾咗我去唔知邊到。

下一秒，我就感覺好似玩跳樓機咁，瞬間飛咗上天，嗰個力就來令到我忍唔住暈，飆曬冷汗。

「大佬，咩來架！救我啦又話守護神......」跟住我就停咗。

「嘻嘻，唔使怕嘅，我帶你睇下呢個美麗嘅世界咋。」Jan調皮咁講。

我合埋嘅雙眼緩緩睜開，發現自己變咗做柳宗元，個景真係「外與天際，四望如一」，「哇，靚到呢，香港話唔定幾千年前都係咁靚......」睇下遠處啲「螞蟻」，相處得幾咁和諧，無打鬥諗返起自己成日睇新聞都係講個社會幾亂，真係心酸。唔緊要啦，有個靚女同我傾計，抵曬。

「不如你以後就來呢個世界生活啦，我見你好鍾意呢到呀......」佢細細聲講。「唔知鍾意嘅係咪有我添呢？」

呢一刻，我好似比電纜電擊咗一下咁，仲要好強烈，因為呢十七年人我從未有任何人同我講過呢啲肉麻說話（係呀男嘅都無），不過我都係唔知答咩好，只係身體好熱。

偷偷睇下隔離嘅Jan，原來佢塊面紅卜卜，我諗我個身咁熱都係因為佢傳比我嘅。

「好啦，你唔答我，我都係比時間你考慮下先。」佢無奈咁放低我落去地面。面容居然仲帶住一絲微笑，加埋嗰個人見人愛嘅小酒窩。

「哇！！！」跳樓機模擬又來多次。

「『小酒窩長睫毛，是你最美的記號......』你係幾好嘅，不過我想返屋企食下薯片先，遲啲返來搵你好無？」我只係覺得個場面好尷尬，係時候比我抖下咁姐。

佢溫柔咁放低我，同時落下咗一滴傷感嘅眼淚。

「咚！」嗰滴眼淚居然係咚一聲而唔係平時咁「滴滴」聲嘅，真係嚇死人。

我真係諗唔到，隨嗰滴眼淚而來嘅，居然係底下成千上萬嘅小人向我衝埋來！

「你居然對Jan守護神咁不敬！兄弟，捉住佢呀！」有個小人領袖命令住班同伴。我反應唔切，佢地已經開始爬上我只腳，拎住武器打我。不過，我只係好無奈咁望住班小人做啲毫無用處嘅攻擊。

「哈哈哈好痕呀大佬們！哈哈......」我全身開始抽搐咁合埋眼笑，因為真係好痕......

「砰！」「哇好痛......」我開眼之後，原來......一切嘅一切，都只係我跌落床之後，一班真正嘅螞蟻因為我琴晚食到跌曬落地下嘅薯片，而爬上我只腳係到咬......夢，真係好真實，不過我呢世人都唔會發生嘅。