全球變暖，有時叫做全球暖化，係指喺一段時間中，地球嘅大氣同海洋溫度上升嘅現象，主要係指人為因素令到溫度上升，原因好可能係由於溫室氣體排放過多造成嘅。

喺20世紀，全球平均接近地面嘅大氣層溫度升咗攝氏 0.74 度。普遍嚟講，科學界認為過去五十年可觀察嘅氣候改變係由人類活動所推動。

二氧化碳同其他溫室氣體嘅含量不斷增加，正係全球變暖嘅人為因素中主要部分。燃燒化石燃料、清理林木同耕作等等都增強咗溫室效應。第一次懷疑溫室效應會發生嘅觀測係瑞典化學家阿累尼烏斯喺1897年所做嘅。雖然當時冇引發公眾討論，但係事隔 90 年，終於變成公眾關注嘅問題。

美國加利福尼亞大學嘅科學家喺太平洋中央夏威夷嘅莫勞島上設立 4 個 7 米高同一個 27 米高嘅採樣塔，每個鐘採樣 4 次，分析二氧化碳嘅變化情況。

目前全球平均溫度嘅變化，幾乎同二氧化碳含量嘅變化係同步上升嘅，工業革命開始嗰陣，二氧化碳嘅含量急劇增加。雖然植物嘅光合作用吸收了好大一部分二氧化碳，海洋亦溶解一部分二氧化碳並固定成碳酸鈣，但係空氣裏面二氧化碳嘅含量重係漸漸增加緊。根據美國維珍尼亞大學同英國東英格蘭大學聯合研究嘅結果，喺20世紀後半葉，全球溫度上升嘅趨勢非常明顯，溫度變化情況睇下面幅圖。