「阿城，出來食飯未呀？日日食凍曬嘅飯餸，一係就食杯麵，幾個月都係咁匿係個房到，都唔知你係咪痴咗線！」

「收聲啦講夠未姐？」我終於頂唔順鬧返佢。

坐喺電腦前面嘅我，已經維持咗喺房入面「食，玩，訓」嘅生活幾個月，數下手指，原來都差唔多一年。眼睇Facebook上面個個都又post自己放榜嘅成績，咁就梗有人好，有人差啦。不過上年因為自己唔好彩，考埋曬啲垃圾出來，就唔好提啦。都係因為呢個垃圾文憑試，先搞到我宜家完全唔想理屋企嗰兩老，邊有屋企人唔係鼓勵自己個仔，而係日日嘈住話。。。

「生舊叉燒好過生你！」

個瘟神又講喇。另外我老豆就直情當我廢嘅，鬧都費事鬧我。

其實我資質唔係讀書到姐，我打機都幾叻呀係咪？英雄聯盟都有金牌嘅。

睇下個Facebook，啲人post嘅永遠都有屋企人係佢地身邊打氣，我嗰兩個真係無眼睇。

「換個阿爸阿媽比我好無？」我喃喃自語，然後極之唔情願咁起身，摸住坐到酸痛嘅腰慢慢打開房門。

「哇！」唔行出去唔嚇一跳，一開個房門成屋即刻黑咗，黑過停電。「撞鬼咩！你兩個快啲整返好盞燈佢啦，咩都睇唔到呀！」

迎接我嘅係一股寒風，加上寂靜嘅黑暗。我諗緊，乜宜家唔係夏天咩，仲凍過香港「世界第一」嘅濕凍！

我企咗喺原位成分鐘，先驚醒：「哇！老豆媽子係邊呀？我撞鬼啦救命呀。。。」然而陪住我嘅，得呢股寒風同黑暗，好「溫暖」咁攬實我。

我呢個不詳嘅預感瞬間搞到我腳仔軟曬，趴咗落地。我抱住個頭合埋對眼，咩都唔敢望，仲差啲失禁。

「噠。」

咦？咩聲？

瑟縮緊嘅我慢慢係雙手嘅隙位望出去。

「係光啊上帝！多謝你為我驅趕鬼怪。。。我係咪安全啦？」我即刻彈起身歡呼，但係全身都係震個唔停。

「Oh no。。。老豆媽子唔見咗。」兩老確實唔見咗，成間屋突然好冷清，乜人都無，又空曠。。。唔係喎，做乜兩老間房多咗個窿，仲識發光？

「中二病」發作嘅我即刻興奮曬，嗰到係咪通往一個異度空間？心諗係咪個天要派個拯救眾生嘅使命比我？

「一於衝入去救返老豆媽子！！」我好激動咁大叫。

我趴低身朝住個窿爬入去。做咗十八年人，都未試過自己離開屋企人遠走他鄉，而且係要完成啲唔知咩使命，個感覺真係好奇怪，新鮮又刺激。

入到去，個光芒背後見到嘅係一條超級長嘅蠕動管道，極度核突，睇見都嚇窒咗一下。不過擁有冒險精神嘅我又點會放棄呢個難能可貴嘅機會？完全係唔使諗就衝過去！

爬呀爬，爬呀爬。。。唔知過咗幾耐，應該都有五分鐘先爬到過去盡頭。

「呼，咁耐先爬到過來。。。係咪玩。。。玩我？身上啲肥肉就來燒曬——哇！我戴咗『縮小鏡』呀？啲人做乜細過隻老鼠？」我好震驚咁叫。

一秒之後，我意識到唔對路——全世界啲「人」望住我。

再一秒之後，震驚嘅變咗佢地，一片混亂之中所有人四方八面逃跑。而我下巴差唔多跌咗落地，眼甘甘望住呢一切發生。

我呆住個呢刻，我只發現，唯獨有兩個似曾相識嘅一男一女，企咗係一間似曾相識嘅屋外同我互相對望，而唔係逃跑。。。